加時挫阿根廷相隔16年再捧盃 狂牛王朝2.0誕生！

2026/07/21

相隔16年，西班牙再度捧走世盃。（Getty Images圖片）

next 1/1 pre

阿根廷（右）今仗以凶狠防守同西班牙對撼。

next 1/1 pre

洛迪卡斯簡迪獲頒世盃金球獎。

next 1/1 pre

西班牙大軍已回國準備勝利巡遊。（Getty Images圖片）

next 1/1 pre

西班牙重奪世盃冠軍！周一凌晨喺紐約上演嘅王者之戰，「狂牛兵團」憑費倫托利斯攻入關鍵一球，喺加時戰1比0擊敗衞冕嘅阿根廷，繼2010年首次奪冠後，相隔16年再次登上世界之巔，連同兩年前歐國盃封王，宣告「狂牛王朝」再現盛世。

西班牙今場沿用4強勝利11人，阿根廷正選就做出3個變動，主角美斯當然擔正，並以39歲零25日之齡成為世盃史上最老決賽上陣非門將球員。控球力強嘅西班牙順利主導戰局，阿根廷則一心逼搶博反擊，上半場形勢陷於捱打，甚至未試過喺西班牙禁區內掂波，半場互無紀錄。

費倫托利斯加時一錘定音

下半場西班牙繼續掌控節奏，製造出多次美妙組織，但最後一擊前被阿根廷瓦解。尾段「狂牛」換入米基爾馬連奴同尼高拉斯威廉斯加強進攻。賽事轉捩點在法定時間補時階段，安素費南迪斯搶波唔收腳，拎到第2面黃牌被逐，雖然90分鐘悶和0比0，但加時戰打多個嘅西班牙提高速度，終於加時下半場一開波，西班牙即搵到缺口，柏度樸路大腳長傳，尼高拉斯威廉斯底線頂番中間，費倫托利斯近門抽入，「狂牛」亦憑呢球贏1比0，登上世盃冠軍寶座。

西班牙今屆雖然冇「美斯級」巨星壓陣，但就以整體足球輾壓群雄，捧走大力神盃後亦包攬多個個人獎項，中場洛迪卡斯簡迪就壓倒美斯榮膺世盃金球獎，門將烏尼西蒙當選「金手套」、19歲中堅古巴斯就獲選為今屆最佳青年球員，「狂牛兵團」成為世盃大贏家。

洛迪壓美斯奪世盃金球獎

喺2008至2012年期間，西班牙標誌式傳控足球，連贏兩屆歐國盃，以及在2010年首奪世盃，成就「狂牛王朝1.0」。雖然喺2014至2022年期間一度走入死胡同，但2022年世盃失利後，佢哋搵咗教青年隊嘅富安迪接手，佢對「狂牛」各級別梯隊相當熟悉，今屆主力球員如法比安彭拿、丹尼爾奧莫、米基爾馬連奴及奧耶沙巴爾，都係富安迪「由細睇到大」，大家互相信任，加上新世代球王拉明耶馬橫空出世，當傳控未能撕破對手防線時，耶馬嘅個人突破，正正係打破平衡嘅爆點，亦係連贏2024年歐國盃及今屆世盃嘅關鍵，以目前嘅班底，「狂牛王朝2.0」肯定仲有排威！

上一則 :

下一則 :